साउन २ नेपाल ।
जिल्ला प्रशासन कार्यालय नुवाकोटले भारी वर्षाका कारण हुन सक्ने विपद्का कारण जिल्लाभित्र रातिको समयमा सबै प्रकारका सवारी साधनको आवागमनमा रोक लगाएको छ।
जल तथा मौसम विज्ञान विभागको पूर्वानुमान अनुसार साउन २ गते शनिबार र ३ गते आइतबार नुवाकोट लगायत आसपासका जिल्लामा भारीदेखि अति भारी वर्षा हुने सम्भावना रहेको छ। यसबाट अचानक बाढी, पहिरो, नदीमा पानीको बहाव बढ्ने र सडक अवरुद्ध हुने उच्च जोखिम रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले समेत जानकारी गराएको छ।
मानवीय क्षति न्यून गर्न र सर्वसाधारणको सुरक्षालाई मध्यनजर गर्दै प्रशासनले २०८३ साउन २ र ३ गते राति १०:०० बजेदेखि बिहान ५:०० बजेसम्म नुवाकोट हुँदै अन्य जिल्लामा जाने तथा अन्य जिल्लाबाट नुवाकोट भित्रिने सम्पूर्ण सार्वजनिक तथा निजी सवारी साधनको आवतजावतमा पूर्ण रोक लगाएको छ।
यद्यपि एम्बुलेन्स, दमकल र सुरक्षा निकायका सवारी साधन यो प्रतिबन्धबाट बाहिर रहनेछन्।
प्रमुख जिल्ला अधिकारी शम्भु प्रसाद रेग्मीद्वारा जारी सूचनामा मौसमको प्रतिकूलता र सडकको अवस्था हेरेर आवश्यक परेमा जुनसुकै बेला पनि आवागमन रोक्न तथा खुला गर्न सकिने जनाइएको छ। प्रशासनले अत्यन्त जरुरी काम नपरी घरबाहिर ननिस्कन र रातिको समयमा यात्रा नगर्न सम्पूर्ण सर्वसाधारण, यातायात व्यवसायी तथा सरोकारवालाहरूलाई अनुरोध गरेको छ।
आपतकालीन सम्पर्क नम्बर:
• नेपाल प्रहरी: १००
• सशस्त्र प्रहरी बल: १११४
• जिल्ला आपतकालीन केन्द्र DEOC: १२३४
प्रशासनले विपद्को समयमा सतर्कता अपनाउन र आधिकारिक सूचनालाई मात्र पत्याउन पनि सबैमा आग्रह गरेको छ।
