असार २६, नेपाल ।
मुगु घर भई हाल काठमाडौंमा बसोबास गर्दै आएका गणेश नेपालीले राहदानी विभाग अगाडि गरेको आत्मदाहको घटनाप्रति अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले गम्भीर ध्यानाकर्षण भएको जनाएको छ।
अनेरास्ववियुको केन्द्रीय समितिले आज जारी गरेको प्रेस विज्ञप्तिमा राज्य संयन्त्रको लापरबाही र असंवेदनशीलताका कारण यस्तो दुखद घटना घटेको ठहर गरेको छ।
के भनिएको छ विज्ञप्तिमा?
अनेरास्ववियुका अध्यक्ष दिपक धामीद्वारा हस्ताक्षरित विज्ञप्तिमा भनिएको छ, “एकातर्फ घरघरमा सेवा पु¥याउने भन्ने सरकारको उदारो आश्वासन र अर्कोतर्फ सार्वजनिक सेवा प्रवाहमा देखिएको लापरबाही, गैरजिम्मेवारी तथा आम नागरिकप्रति राज्य संयन्त्रबाट हुने अमानवीय व्यवहारले नागरिकलाई यस्ता कठोर कदम चाल्न बाध्य पारेको छ।”
विद्यार्थी संगठनले गरिबहरूको दुःखमा असंवेदनशील रहेको आरोप लगाउँदै “बालेन सरकारले सम्झाई बुझाई गरेर समाधान हुन सक्ने साधारण घटनामा समेत निमुखालाई ढाड सेक्ने प्रवृत्तिका कारण आजको दुखद घटना घटेको” बताएको छ।
अनेरास्ववियुका मागहरू
घटनाप्रति दुःख व्यक्त गर्दै अनेरास्ववियुले २ वटा मुख्य माग अघि सारेको छ:
१. उपचारको माग: घाइते गणेश नेपालीको शीघ्र स्वास्थ्यलाभको कामना गर्दै उनको उपचारमा राज्यले कुनै पनि कसर बाँकी नराखी प्रभावकारी, निःशुल्क तथा आवश्यक सम्पूर्ण उपचारको व्यवस्था गर्न।
२. छानबिनको माग: उक्त घटनाको निष्पक्ष छानबिन गरी जिम्मेवार पक्षलाई कानुनी दायरामा ल्याउन।
पृष्ठभूमि
मुगुका गणेश नेपालीले राहदानी बनाउने क्रममा भएको झन्झट र राज्यको व्यवहारबाट पीडित भई राहदानी विभाग, त्रिपुरेश्वर अगाडि आत्मदाहको प्रयास गरेका थिए। यो घटना सार्वजनिक भएपछि सामाजिक सञ्जाल र विभिन्न संघ-संस्थाबाट राज्यको सेवा प्रवाहप्रति व्यापक आलोचना भइरहेको छ।
अनेरास्ववियुले आफ्नो विज्ञप्तिको सुरुमै “देशभरिका सम्पूर्ण प्रगतिशील, देशभक्त तथा जनवादी विद्यार्थीहरू एकजुट होऔं” भन्ने नारा पनि उल्लेख गरेको छ।
