२१ जेठ, काठमाडाैं ।
राष्ट्रियसभाको आजको बैठकले संविधानसभा सदस्य तथा पूर्वराज्यमन्त्री मीना पाण्डेको निधनमा शोक प्रस्ताव पारित गरेको छ ।
राष्ट्रियसभाका अध्यक्ष गणेशप्रसाद तिमिल्सिनाले प्रस्तुत गर्नुभएको उक्त शोक प्रस्ताव सर्वसम्मतिले पारित भएको हो । उहाँको निधनप्रति भावपूर्ण श्रद्धाञ्जली अर्पण गर्दै शोक–सन्तप्त परिवारजनप्रति गहिरो समवेदना प्रकट गरेको छ ।
स्वर्गीय पाण्डे नेपाली कांग्रेस पार्टीबाट २०४८ र २०५१ सालमा प्रतिनिधिसभा सदस्यमा निर्वाचित, विसं २०६४ सालको संविधानसभा निर्वाचन र विसं २०७४ सालको प्रतिनिधिसभाका निर्वाचनमा समानुपातिक सदस्यमा निर्वाचित हुनुभएको थियो ।
पूर्वमहिला, बालबालिका तथा समाजकल्याण राज्यमन्त्री समेत रहनुभएकी उहाँ सालिन र सरल नेत्री हुनुहुन्थ्यो । उहाँको ७२ वर्षको उमेरमा यही जेठ १६ गते असमायिक निधन भएको थियो ।
राष्ट्रियसभाको अर्को बैठक सोमबार १ बजे बस्नेछ । स्राेत रासस