राष्ट्रिय समाचार समिति (रासस) र नेपाल पर्वतारोहण सङ्घ (एनएमए) बीच आज समझदारीपत्रमा हस्ताक्षर भएको छ । नेपालको पर्वतारोहण क्षेत्रको प्रचारप्रसार गरी विश्व समुदायमा पर्यटन प्रवद्र्धन गर्ने उद्देश्यअनुसार दुई संस्थाबीच समझदारी भएको हो ।
आज यहाँ आयोजित एक समारोहबीच राससका महाप्रबन्धक सिद्धराज राई र एनएमएका वरिष्ठ उपाध्यक्ष ठाकुरराज पाण्डेले समझदारीपत्रमा हस्ताक्षर गर्नुभएको थियो । आगामी साउनदेखि लागू हुने समझदारीपत्रमा सङ्घका गतिविधि, पर्वतारोहण क्षेत्रका विषयवस्तुहरुलाई समाचार, आलेख, विचार, अन्तर्वार्तालाई छापा, श्रव्य, श्रव्यदृश्य र तस्बिरको माध्यमबाट प्रचारप्रसार गर्ने उल्लेख छ ।
सो अवसरमा महाप्रबन्धक राईले राससले पहिलोपटक संस्थागत रुपमा एनएमएसँग समझदारी गरेको र यसलाई विस्तार गर्दै अन्य सङ्गठित संस्थाहरुसँग पनि समझदारी गर्दै जाने बताउँदै राज्यको जिम्मेवार समाचार संस्थाका रुपमा राससले देशभित्र र बाहिर पनि सकारात्मक सन्देश जाने समाचार सामग्रीहरुलाई प्राथमिकतामा राखेको उल्लेख गर्नुभयो । एनएमएका वरिष्ठ उपाध्यक्ष पाण्डेले पर्वतीय पर्यटनको प्रवद्र्धन गर्दै विश्व समुदायमा नेपालको परीचय अभिवृद्धि गरी मुलुकको अर्थतन्त्रलाई सबलीकरण गर्न रासससँगको सहकार्य फलदायी हुने विश्वास व्यक्त गर्नुभयो ।
सो अवसरमा राससका बोर्ड सदस्य कृष्ण अधिकारी र बजार शाखाप्रमुख राजाराम कार्की तथा एनएमएका कोषाध्यक्ष मुक्ति पाण्डे, बोर्ड सदस्य पिताम्बर गुरुङ, सचिव धनबहादुर गुरुङ, प्रमुख कार्यकारी अधिकृत कुलप्रसाद राईलगायत उपस्थित हुनुहुन्थ्यो ।
यसैबीच आजै एनएमएलाई नबिल बैंक लिमिटेडका तर्फबाट संस्थागत सामाजिक उत्तरदायित्वअन्तर्गत रु १० लाख आठ हजार रकमको चेक हस्तान्तरण गरिएको छ । पर्वतारोहणमा जाने आरोहीहरुको निधन भएमा उनीहरुका छोराछोरीलाई छात्रवृत्तिका लागि सो रकम प्रदान गरिनेछ । बैंकका वरिष्ठ सम्पर्क प्रबन्धक रोशन कोइरालाले चेक हस्तान्तरण गर्दै बैंकले सामाजिक उत्तरदायित्वअन्तर्गत पर्वतारोहणमा जाने आरोहीको निधन भएमा उनीहरुका छोराछोरीको शैक्षिक विकासमा सहयोग गर्ने र यस्तो सहयोग रकम बढाउँदै लगिने जानकारी दिनुभयो । रासस