प्रतिनिधिसभा सदस्य तथा नेपाली कांग्रेसका केन्द्रीय सदस्य सुशीला थिङले जननिर्वाचित प्रथम प्रधानमन्त्री तथा कांग्रेसका संस्थापक विश्वेश्वरप्रसाद कोइराला (विपी)ले अवलम्बन गरेको राष्ट्रिय मेलमिलाप नीतिलाई अनुशरण गरेर अघि बढ्नुपर्नेमा जोड दिनुभयो । राष्ट्रिय एकता तथा मेलमिलाप दिवसका अवसरमा आज कांग्रेस सिन्धुलीले सिन्धुलीमाडीमा आयोजना गरेको कार्यक्रममा उहाँले नेता तथा कार्यकर्ताले विपीको मेलमिलापलाई आफ्नो जीवनमा रुपान्तरण गर्नुपर्ने बताउनुभयो । विपीको मेलमिलाप नीतिलाई कांग्रेसले व्यक्ति–व्यक्तिबीच पुर्याउन जरुरी रहेको उहाँको धारणा छ । “वडा, जिल्ला हुँदै प्रदेश र सङ्घसम्म विपीको मेलमिलाप नीति लागू गर्न सके मुलुकका धेरै समस्या समाधान हुन्छन्, विपीको मेलमिलाप नीतिलाई हाम्रो जीवनमा रुपान्तरण गरौँ । विचारको पुस्तान्तरण पार्टीभित्रै हुन जुरुरी छ”, उहाँले भन्नुभयो । कांग्रेस निर्वतमान सभापति उज्ज्वलप्रसाद बरालले विपीको नेतृत्व, विचार, धारणा, जीवनशैली र उहाँको योगदानलाई सम्झिनुभयो । अहिले देश सङ्कटमा रहेको उल्लेख गर्दै उहाँले भन्नुभयो, “विपीले पहिले नै भन्नुभएको छ नि, प्रजातन्त्र नरहे देश नै रहँदैन, देशमा हिजोभन्दा आज झन् सङ्कट देखिरहेको छु । यो राष्ट्रिय सङ्कटबाट देशलाई जोगाउने हो भने प्रजातान्त्रिक धारलाई अझै बलियो बनाउनुपर्छ । प्रजातन्त्र कमजोर हुनुको अर्थ हो, यो देशलाई फेरि सङ्कटमा झार्नु ।” कांग्रेस सिन्धुलीका सभापति उपेन्द्रकुमार पोखरेलले कांग्रेस सत्ताका लागि नभई जनता, देश र लोकतन्त्रका लागि राजनीतिमा लागेको बताउनुभयो । मुलुकको ऐतिहासिक विरासत बोकेको लोकतन्त्रको पर्यावाची शब्द नै कांग्रेस रहेको उहाँको दावी थियो । प्रतिपक्षमा बसे पनि सत्तापक्षका गलत क्रियाकलापविरुद्ध सडकमा उत्रिएर सजग गराउने उहाँले सुनाउनुभयो । सबैभन्दा ठूलो दल हुँदाहुँदै पनि सत्ताबाट विमुख हुनपरेकोे अहिलेको परिस्थितिमा हतास नबनी र निरास नभई जनताको सेवामा जुट्न उहाँले आफ्ना नेता तथा कार्यकर्तालाई सुझाउनुभयो ।